सोलापूर : सोलापूर विद्यापीठाच्या अंतर्गत सन २०१६मध्ये प्रथम वर्ष अभियांत्रिकीची परीक्षा मे महिन्यात घेण्यात आली होती. या परीक्षेमध्ये ए. जी. पाटील अभियांत्रिकी महाविद्यालयाच्या प्रथम वर्षातील विद्यार्थ्यांनी चांगले यश संपादन केले. महाविद्यालयाचा निकाल ८० टक्के लागला.
हीना सैफन इनामदार (सिव्हिल इंजिनीअरिंग) हिने ९.५६ एवढा सीजीपीए मिळवून प्रथम क्रमांक पटकावला. कोमल घाटे (कम्प्युटर इंजिनीअरिंग) हिने ९.३३ सीजीपीए मिळवून द्वितीय क्रमांक पटकावला. मोहनीश कांबळे याने ९.१४ सीजीपीए मिळवून तृतीय क्रमांक पटकावला. बेसिक सिव्हिल इंजिनीअरिंग या विषयाचा निकाल १०० टक्के लागला.
या वेळी संस्थेचे अध्यक्ष ए. जी. पाटील, सेक्रेटरी एस. ए. पाटील, कॅम्पस डायरेक्टर डॉ. एम. ए. चौगुले, प्राचार्य डॉ. एस. ए. पाटील, उपप्राचार्य प्रा. व्ही. व्ही. पोतदार, सर्व विभागप्रमुख यांनी १०० टक्के रिझल्ट लागल्याबद्दल प्रा. पी. एस. स्वामी यांचे आणि यशस्वी विद्यार्थ्यांचे अभिनंदन केले व त्यांच्या पुढील वाटचालीस शुभेच्छा दिल्या.
‘प्रथम वर्ष हे अभियांत्रिकी शिक्षणात खूप महत्त्वाचे असते. त्याकरिता महाविद्यालयात विशेष परिश्रम घेतले जातात. विद्यार्थ्यांना सेमिनार, मिनी प्रोजेक्टसाठी उद्युक्त केले जाते. तसेच विद्यापीठाने दिलेल्या योजनेनुसार सर्व कृती केल्या जातात,’ अशी माहिती प्राचार्य डॉ. एस. ए. पाटील यांनी दिली.
याकरिता प्रथम वर्षाचे समन्वयक प्रा. आर. बी. कुलकर्णी आणि प्रथम वर्षाला शिकवत असलेल्या सर्व शिक्षकांनी विशेष परिश्रम घेतले.